【飲奶粉唔怪之得咁大隻啦】

健身補充品種類五花百門，BCAA、Testosterone、Glutamine、Creatine等等。最多人食嘅莫過於蛋白粉（又稱奶粉）。好多人見到玩健身嘅朋友劈頭就會問「你有冇飲奶粉嫁？」。對於食蛋白粉，好多時一般大眾會有個誤解，彷彿食左就好易大隻。好輕易將一個人係健身房嘅努力全歸於蛋白粉嘅功勞。「飲奶粉唔怪之得咁大隻啦。」好多時都會令人聽得不是味兒。話說在頭，我本身從來冇食蛋白粉（除左出於好奇想知咩味飲過兩啖）。我亦唔特別主張係有得選擇嘅情況下飲奶粉，但我希望糾正各位對健身補充品由其是蛋白粉嘅誤解。

奶粉不過是食物

奶粉不過是食物

健身奶粉一般可以分為兩種：乳清蛋白（顧名思意主要成份為蛋白質，亦有較高分離度的乳清蛋白分離粉）及增肌粉（主要成份除了蛋白質，仲有大量碳水化合物）。無論邊種，佢地都應該被視為「食物」多於「藥物」。畢竟蛋白質同碳水化合物都係我地每天三餐都會攝入嘅營養素。

缺乏適當訓練係絕對不會變大隻

飲奶粉會大隻？

「飲奶粉唔怪之得咁大隻啦。」非也。補充品之所以為補充品，因為佢只作補充正餐及訓練嘅用途。簡單黎講，只飲奶粉而缺乏適當嘅訓練係絕對唔會變大隻。練大隻係需要毅力、恆心同正確嘅訓練。所以將功勞全歸於蛋白粉而抹殺自身嘅努力並不恰當。

飲奶粉會肥？　

正如我頭先所講，奶粉不過是食物。食得多增肌粉固然會肥（固意被設計為卡路里高的產品），食得多乳清蛋白亦同樣會肥。1g蛋白質4大卡，攝取多於你本身所需要嘅卡路里當然會變肥。所以除左要計算你應該食幾多之外，更應配合訓練。

奶粉應被視為一種方便嘅蛋白質來源

我需要飲奶粉嗎？

呢個問題應該問自己。你日常飲食能夠配合你訓練所需嗎？舉例說，我係【減肥101：飲食篇】解釋過，以我為例每日需要170克蛋白質、57克黎自脂肪、301克碳水化合物。如果覺得每日食170克蛋白質有困難嘅，可以考慮利用補充品去幫助我更方便去完成我嘅目標。始終飲一次奶粉方便過下下要搵肉食。每克蛋白質計算亦比肉類平。奶粉應被視為一種方便嘅蛋白質來源，以配合城市人嘅生活。當然，如果你本身已經可以從日常飲食得到應有嘅高量營養素，奶粉便冇用處。

努力、毅力同正確訓練先係主菜

我的看法

我個人始終崇尚較自然嘅飲食，亦建議各位如非必要（工作、生活、瘦底等等）都唔好依賴補充品。無論食又好唔食又好，呢篇文章最想帶出嘅信息係唔好妖魔化健身奶粉，佢同類固醇或其他激素有著本質上嘅分別。即使飲奶粉都好，努力、毅力同正確訓練先係主菜。

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com