【談廣東燒味】

對於要增重嘅朋友黎講，每次出街食飯都係一個挑戰。究竟食啲咩先夠蛋白質之餘又有足夠熱量，但又相對少飽和脂肪呢？好簡單姐，食牛扒加薯蓉咪得囉！係姐，但係餐餐鋸扒都幾貴下。

燒味是我的好朋友

我一向強調飲食嘅可行性同可持續性。要增重，最理想當然係白煮肉類再加上份量合適嘅飯、蕃薯等碳水化合物，令脂肪增加減至最少。對於普遍番office嘅朋友黎講，跟本冇可能餐餐自己煮／磅好哂份量。如果要出街食的話，燒味飯就可以係一個唔錯嘅選擇。當然切雞飯就最理想啦，高蛋白質之餘亦相對少脂肪。但去到燒味店，又點可以唔食叉燒呢。半肥瘦叉燒餸飯諗起都正。最重要係一個燒味飯先幾十蚊。比起餐餐自己準備／餐餐出去鋸扒，呢個無疑係一個較可行嘅選擇。

半肥瘦叉燒餸堅正

叉燒的藝術

個人黎講，食叉燒食全瘦就不如唔好食。可惜，好食嘅野永遠都係無益。先唔講半肥瘦叉燒嘅肥膏係高卡兼飽和，蜜汁叉燒之所以咁好味，係因為落左蜜糖一齊燒。糖黎講即使係增磅其間亦應盡量避免，高熱量亦高GI（升糖指數）。咁唔通唔食得叉燒？

分配卡路里的學問

大局為重　

答案係：未必。如果你係處於增肌狀態又識得分配你嘅卡路里，半肥瘦叉一樣可以係你三餐入面出現。首先，係增肌（或稱上磅／增磅／Bulking）嘅時候我地唔希望能量（卡路里攝取）成為限制肌肉生長嘅因素。所以我地會攝取比需要較多少少嘅卡路里，就好似油顏色時故意油出少少界再擦番咁（呢個比喻好似有點怪）。

第一， 可以叫個叉雞雙拼飯。切雞嘅卡路里相對低，叉燒份量亦比叉燒飯減半。切雞亦可唔食皮（要食肥叉就要犧牲下）

第二， 薑蔥油另上。

第三， 飲品方面就唔好諗喇，檸茶檸水走甜吧。（你都食左半肥痠叉啦，仲想點？）
第四，可考慮將飯轉為米粉，進一步減低卡路里攝取（1碗米粉~1/2碗白飯＝140卡路里）

我的飯堂

必去飯堂　

由四、五年前係中環上班開始，我都慣左去龍記食燒味。除左因為地址就近，亦都鐘愛佢叉燒燶燶地夠香亦夠冧，有肉味。連水吧姐姐都記得我飲凍啡走甜，非常有人情味。當然世上任何事都一樣，適可而止，飲食均衡至為重要。

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com
Calvin Gor 相機