【如何分辨真假減肥運動】

減肥教學短片係社交媒體非常盛行（冇錯我都有份）。好多媒體（甚至某啲教練），為左多人關注，片段往往有誇大功效什至有錯誤成份。咁究竟點先分到邊啲片應該跟邊啲唔洗嘥時間做呢？

並不存在局部減肥

１）局部減肥
聲稱局部減肥嘅片幾乎全部都唔洗睇。修拜拜肉、減小腿、切肚腩、燒大脾，統統都可以唔洗睇。正如所講，身體係一個整體，並不存在局部減肥。所以做腹肌練習並不能夠減肚腩，做手臂練習亦唔可以減拜拜肉。
減唔到，又可唔可以收firm啲呢？
理論上你鍛鍊某組肌肉，佢係會強壯同結實。但其實大部份人嘅問題係脂肪太多，而呢類不痛不癢口嘅動作其實解決唔到問題。最好都係由飲食同正確運動著手。１２３

重點在於高強度而非間歇性

２）偽高強度間歇性訓練（HIIT）
HIIT嘅重點係在於高強度（High Intensity）而非間歇性（Interval）。間歇性休息只不過係因為你身體冇可能長時間進行高強度運動。咁既然高強度先要間歇性，咁當然低強度就冇咁嘅需要啦（如緩步跑）。但偏偏坊間好多媒體／教練都會以「高」強度間歇性訓練更有效消脂為名，拍「低」強度間歇性訓練。做完十幾廿秒拉毛巾，再做十幾廿秒plank咁，氣都唔喘下，好明顯就係強度不足。

３）冇腳嘅雀仔
運動減肥，說穿了即是用肌肉活動去消耗能量（卡路里）。而腳係身體最大嘅肌肉（包括臀，前、後大腿）。如果你睇開嘅trainer／媒體冇放足夠嘅注意係下半身，甚至完全冇下半身嘅動作，其實基本上都可以唔洗睇。

Shoulder Circles真的可以減肥？

４）只著重單關節動作
承上點，既然要用肌肉活動去消耗能量（卡路里），當然係愈多肌肉參與成效愈大。一般而言，單關節運動只會用到一組肌肉。例如三頭肌伸展（只用到肘關節），主要只會用到三頭肌（如果姿勢正確）。但多關節運動如深蹲（腳踝、膝及髖關節），則會用到股四頭肌、臂大肌、膕繩肌及核心肌群等等。所以如果你睇開嘅減肥短片係完全冇多關節運動，咁佢嘅效用都相當有限。

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com