【點減肥仔波、大肚腩、拜拜肉...？】

「點先減到我對肥仔波？」、「我睇電視話咁可以減到拜拜肉，係咪？」、「我淨係想瘦個肚咋！」彷彿淨係想減身體某個部分係一個好細、好簡單嘅要求咁。多得都市X情呢類嘅師奶節目，令大眾都有個想法係世上有一種局部瘦身嘅方法。但事實係殘酷嘅，任由我幾想一刀切左我個肚啲肥肉出黎都好，身體係一個整體，並唔存在任何局部減肥嘅方法。要減就要全身一齊減。因為就算我做多幾多千下幾多萬下Sit up都好，我個肚都只會係差唔多。

話雖如此，對住肥仔波、拜拜肉等問題我地都依然有解決辦法嘅。

１）要減就要全身一齊減
有肥仔波唔一定要淨係減對波嘅姐。當你全身一齊瘦嘅時候，你想減嘅部位都一樣會瘦。點先可以全身瘦？咁你就要花啲時間睇下【減肥101：飲食篇】喇。

２）全身瘦，得個肚
你身邊總有啲朋友係全身都冇幾兩肉，但偏偏就有個肚腩仔。每個人天生會儲存脂肪嘅位置都唔同。有啲人會傾向存係個肚、有人會係個臀部亦有人會好似我咁肥係條腰度。每次肥最易就係肥嗰個位，但要瘦就最難瘦嗰個位。如果你真係想視覺上淨係瘦個肚，而唔想本身已經冇乜肉嘅手手腳腳再幼落去的話，就唯有加入更多四肢訓練。令對手減少脂肪嘅同時加番幾兩肌肉。咁視覺上你就好似淨係冇左個肚腩仔咁（拜拜肉都少啲）。

全身瘦得個肚，唔係因為你個肚太肥，係你全身都冇乜肌肉

3）只有運動好
好多美容院都有好多乜機乜機聲稱可以切脂、局部減肥等等。成效有幾多我唔敢講（老實講唔見有幾多），但肯定好X貴。原諒我思想守舊，與其花咁多錢去訓係度比機震下照下。不如比少少錢請個教練做下運動好過啦。機唔一定會有效，做運動到減肥就必然。嘅然錢都預左比，梗係想有用啦係咪先？

正正經經搵個教練，唔係值得好多咩？

世上冇免費午餐，想減肥唔係一朝一夕，亦都唔係得閒揸個水樽舉幾下或者做兩次Treatment就得。聰明嘅你試諗下，如果係咁簡單，咁呢個世界又點會有肥人呢？

唔係針對教練，我相信佢自己都唔會只係做毛巾操。只係節目有誤導。如果係咁簡單，咁呢個世界又點會有肥人呢？

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com
Google