【減肥101：原理篇】

都市人十個有九個都話要減肥。多人講就少人做，每個人身邊總有個朋友講左九萬幾次減肥都完全冇瘦到。老實講，對比其他目標（力量、局部體型改善、運動能力等等），減肥其實相對簡單。只要了解自己身體嘅運作同箇中原理，就其實每人都可以做到。為免太長篇大論，我盡量言簡意賅、深入淺出去作解釋比對運動較少應識嘅朋友知。

（減肥不等同於減重！）

要減肥首先要知道咩叫減肥，看似簡單但亦恕我口水多講一次。好多人將減肥等同於減重，非也。我地姑且將「減肥」定義為將身體脂肪質量同比例減少。「減重」就顧名思義係體重嘅下降。身體由不同物質組成，有骨骼、肌肉、脂肪等等。所以體重嘅下降未必同身體脂肪減少有關，有可能你只係少左水份、肌肉或者每樣皆是。我地嘅目標應鎖定係「減肥」上。（必須詳細解釋，好多人係減肥初期見體重冇乜下降就會萌生放棄念頭。）

（簡單黎講就係支出同攝取嘅平衡）

有人話人生最緊要「食得、訓得、痾得」。有入有出，簡單一個道理。如果食落肚嘅食物多過你需要嘅，多出黎嘅能量就會儲係你身體令你肥。相反，只要你食落肚嘅食物少過你消耗嘅能量，你就會瘦（呢度指嘅係減重）。明白呢個道理就唔難知道其實無論減肥同減重理論上有三個方法；減少攝入嘅卡路里（卡路里為熱量單位，熱量愈高卡路里愈高，套用係食物上勉強可以理解做更肥）、增加消耗嘅卡路里（多做運動／提升基礎代謝）或者兩樣都做。

（節食減肥，減重之餘亦容易減去寶貴嘅肌肉）

如果只靠減少攝入嘅卡路里／節食減肥。減重之餘亦容易減去我地寶貴嘅肌肉。唔好以為只係對想大隻嘅男士有影響。肌肉對男女一樣重要，需知道我地身體嘅肌肉係會隨年月流失為我地帶來好多健康問題，係度唔詳談。只靠減少攝入嘅卡路里亦會減低基礎代謝率，令我地有欠缺精神、容易衰老等問題。更甚，當你減少攝入卡路里一段日子，體重嘅減少會變得緩慢或停濟。到時你可以做嘅就只係減少更多攝入嘅卡路里。不斷循環，食得愈來愈少，以上問題只會愈來愈嚴重。（【減肥101：飲食篇】）

聰明嘅你睇到呢度應該已經估到，我想講嘅係要減少攝入嘅卡路里之餘亦都要多做運動。咁究竟做咩運動先最有效？見【減肥101：運動篇】。

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com
Calvin Gor私人照