【唐文龍操肌秘技？】

宜家呢個世界嘅資訊已經犯濫到一個令人非常討厭嘅地步。好多所謂媒體／內容農場（英文：Content Farm）為左流覽量，不斷大量發放標題吸引、報導內容準確性成疑嘅文章。由其係針對身體嘅文章就對讀者嘅影響就更加大（就有如總有啲親戚會不斷係群組發放「十種食物千萬不能吃、每天十分鐘長壽二十年」等等嘅文章）。我今朝係社交網站見到一篇題為【唐文龍多年都係fit爆 公開6招操肌秘技 咪食白麵包】嘅文章，我抱住學習嘅心態入去睇。唔睇由自可，一睇把幾火。首先，我明白各人有各人對待自己身體嘅方法，你要點對自己嘅身體亦都唔由其他人管。但老實講文章中有部分所謂「秘技」不但含有不正確資訊，如果大眾跟住做更加係好易受傷。

（內容農場內容準確性成疑）

首先，其中一點有提到「他又提醒大家每晚8點後，便不要再進食，不要讓自己每天吸收超過一茶匙的油。」嗯，先勿論進食時間。除非你係全職健美運動員，如果唔係一個正常嘅都市人跟本冇可能做到每日進食少於一茶匙油。如跟佢所講，除左要每日帶飯之外，更要差唔多只可以烚同蒸。好多時朋友comment/ Inbox我問有關於健身嘅問題，我都盡量會提議一啲可行性高、實行上最少阻礙嘅方案。起碼唔會令人覺得健身／有個好嘅體型係mission impossible。又，就算真係有人可以跟住呢個建議而做得到，中途放棄嘅機會亦太大（既影響社交，又冇人生），最終只會令人敬而遠之。

（脂肪不應被妖魔化）

其次，脂肪妖魔化應該係二十世紀最大嘅迷信。每人都必須吸收足夠嘅脂肪以保持身體嘅正常運作。如果長期吸收過少嘅脂肪，有機會令人產生荷爾蒙失調等等問題。所以長期每日進食少於一茶匙油絕對唔係健康嘅做法，更唔係達到理想身型或操肌嘅所謂「秘技」。

（自己下功夫去搜尋有興趣資訊方為上策）

第三，文中提到「他千叮萬囑大家不要吃白麵包，因為這是最肥的食物，正常人每天的體力勞動根本不能消耗得到。」的確白麵包並唔係健身人仕／普羅大眾最理想嘅食物，升糖指素高，營養單一，纖維亦少。但佢排隊都未排到會叫最肥，如果要戒食白麵包，不如大家係戒食甜麥皮、甜品、甜飲品好過啦。「正常人每天的體力勞動根本不能消耗得到。」嗯，我可以好肯定咁同大家講正常人每天的體力勞動（基礎新陳代謝）係一定可以消耗得到白麵包，只要你唔係瘋狂咁食。如果比姨媽姑姐們見到呢句說話，麵包鋪真係多得佢地唔少。

（白麵包係唔好，但未至於正常人每天的體力勞動根本不能消耗得到）

文中都有講到習武時手部不停撞撃，會刺激到手部肌肉和腕骨，繼而得到強化。呢樣野雖然唔係完全錯誤，但其實如果讀者訓練不當，好容易造成手腕問題。我地嘅手腕係非常脆弱，如果唔係有特別需要／職業要求／競技運動員，普羅大眾絕對冇必要用撞撃去強化手腕。

（朋友，珍惜你手腕）

我並唔係針對唐文龍本身，正如頭先所講各人有自由決定對自己身體做任何野。唐先生亦有機會係因為工作需要先要用到如此「秘技」，但希望以後各媒體／內容農場刊登時可以多提醒讀者。我諗對抗垃圾媒體／內容農場嘅最好方法就係用下腦，用下常識去思考你睇緊嘅文章。我相信互聯網上有好多有用嘅資訊，如果大家真係對某啲課題有興趣，何不自己下功夫去搜尋一下、做下功課呢？畢竟，餵得比你食嘅，好極都有限。

Youtube Channel: CalvinGor 

Instagram: CalvinGorHK 

Facebook: Calvin Gor

Email: shuping463@gmail.com

圖片來源：

www.pexels.com

www.nmplus.hk